بقلم/ حنان العسيلي
لأنك أنثى..
- مينفعش تعلّي صوتك، مش من حقك تتعصبي، العصبية مش لايقة عليكي، إنتي بنت.
- مش من حقك تخرجي كتير، الناس يقولوا عليكي إيه؟
- مفيش سفر لوحدك، لما تتجوزي سافري مع جوزك.
- بالنسبة لموضوع الجواز بقى.. لازم تفهمي إن الجواز له سن معين، بعد كده هيفوتك قطر الجواز.
- مترفضيش أي عريس من برة البيت، ادّيله فرصة يتقدملك في البيت، إنتي عايزة الناس يفتكروا إن فيه حد في حياتك أو يقولوا مفيش حد بيتقدملها خالص؟!
- اتجوزي واتطلقي أحسن ما تفضلي قاعدة كده.
- إنتي مطلقة، لازم تتنازلي شوية في جوازتك التانية، لازم تيجي على نفسك لأن فرصك في الجواز هتكون قليلة جدًا بحكم إنك اتجوزتي مرة قبل كده.
- مستقبلك الحقيقي في شغل البيت، لازم تعرفي إنك هتبقي متميزة وناجحة لما تكوني ست بيت شاطرة، مش هتكوني ناجحة بشهاداتك ولا دراساتك ونشاطاتك الكتير.
- مينفعش تعترضي كتير على حاجة غلط في شغلك، متجادليش، هيقولوا عليكي بتاعة مشاكل، سُمعتك هتبوظ.. البنت سُمعة.
لأنك أنثى.. لازم تضربي بكل الكلام اللي فات ده عرض الحائط.
لأنك أنثى..
- لازم تعلّي صوتك وتصرخي في وش الغلط.
- من حقك تخرجي وتعملي كل اللي إنتي عايزاه طول ما إنتي مبتغضبيش ربنا.
- من حقك تسافري لو مستقبلك ونجاحك متعلق بالسفر ده، متستنيش من أي حد إنه يكون سبب في عمل حاجة إنتي محتاجاها وبتحبيها، إنتي كائن كامل مش مستنية حد يكملك.
- الجواز ملوش سن محدد.. مفيش حاجة اسمها قطر الجواز، متتجوزيش واحد أمه زهقت منه ومن تربيته، وعايزة واحدة تانية تربيه وتشيل مسؤوليته بدالها.. متتجوزيش غير لما تلاقي واحد أرجل منك.
- متتهاونيش في حقوقك وكرامتك مع زوجك عشان المركب تمشي، المركب هتغرق.. هتغرق بيكي لوحدك يوم ما هتتنازلي عن جزء من كرامتك.
- الطلاق مش بيقلل منك في حاجة، الطلاق بيديكي فرصة تانية عشان تدوري على حياة أفضل، مش لازم تكون في الجواز، ممكن تكون في شغل.. في دراسة.. في سفر.
- شغل البيت مش مسؤولية البنت، شغل البيت تطوع منها.. اجتهدي واشتغلي وركزي في كل النشاطات اللي بتحبيها وبتحققلك كيانك وذاتك.
- كل حاجة بتشتغلي فيها وبتتعلميها بتديكي خبرة وبتعلمك إزاي تكوني أقوى، وإنك متحتاجيش لأي حد يوم ما هتلاقي نفسك لوحدك.
- خديها قاعدة.. متستنيش من أي حد أي حاجة.
- متلبسيش الحجاب غير لما تحسي إنك بتلبسيه عشان ربنا في المقام الأول والأخير.. متلبسيش الحجاب موضة، لأنك هتلبسيه غلط، وغيرك من البنات هيقلدوكي، ووقتها مش هتتحملي ذنبك إنتي بس، لكن هتتحملي ذنب أي بنت قلدت حجابك الغلط.
- متسكتيش على حاجة غلط شايفاها في شغلك، متتعامليش بنفاق، ومتشجعيش حد إنه ينافقك "الساكت عن الحق شيطان أخرس".. لازم تتأكدي إن ربنا هيقف جنبك إنتي مش هيقف جنب شيطان.
- متسلميش حياتك ومشاعرك ومستقبلك لقرارات غيرك، لأن محدش بيحس بالوجع غير الموجوع، ومحدش بيداوي الجرح أحسن من صاحب الجرح نفسه.
- اتمردي على أي حاجة وكل حاجة غلط في مجتمعك، متستنيش إنها تتغير، غيّريها إنتي بنفسك.
- لأنك أنثى.. لازم تكوني قوية.. لازم تفهمي إن دموعك اللي بيتسكف منها الرجل وبيعتبرها ضعف، هي سبب قوتك.. لأن زي ما أثبتت بعض الدراسات النفسية إن الأنثى لما بتبكي بتستعيد قوتها من تاني.
ربنا كرمك وذكرك في القرآن 24 مرة وذكر الرجل 24 مرة.
مش من المنطقي إنك تسمعي لكلام بشر، بشر اتربوا على مبادئ غلط، بيقيسوا أفعالهم بميزان العيب والصح.. مش ميزان الحلال والحرام.
