هل تعلم إنك ممكن تسعد حبيبتك في الفالنتاين ببلاش؟
خليني صريحة معاك.. مش ببلاش أوي يعني، إن جيت للحق مش ببلاش خالص، بس أنا قلت أجرجر رجلك عشان أكيد هتحب توفر.
الفكرة حقيقي إنك مش لازم تجيب حاجات غالية أوي أو تدفع فلوس كتير عشان تخلي يوم الفالانتاين يوم ميتنسيش.. صحيح الستات بتحب الهدايا بس اللي أكتر من الهدايا كمان إنها بتحب المفاجأة، بتحب تحس إن حد فكر فيها وخطط عشان يفرحها، إن حد بيعملها حاجة أصلاً بدل ما هي مطالبة طول الوقت إن هي اللي تعمل.. وممكن نعترف إن الستات مبتحبش الاستسهال وبتفرح أكتر لما تحس إن الحاجة متعوب فيها.. وبتحب الدلع كمان، والدلع بينفع يتعمل من غير مصاريف كتير.. زائد إن أفلام الرومانتيك كوميدي واكلة دماغنا كلنا والله.. فشوية ساسبينس كده ممكن يخلوك فارس الأحلام اللي محصلش.. اتشطر إنت بس.
ومن موقعي هذا، أحب أقدملك مساعدة في صورة كام فكرة لهدايا ومفاجآت بسيطة بس مبهجين جدًا جدًا.
1- الحرية مغلفة بورق سيلوفان
لو بنتكلم على مراتك أم عيالك، فهي في الغالب كائن مطحون ومعذب ومتيم وجريح.. وعن تجربة، أؤكدلك إن من الهدايا اللي تفرح أي زوجة وأم إنك تديها حريتها الكاملة لمدة يوم.
خطط خطة بسيطة ممكن تتضمن حاجة واحدة مكلفة، أو ممكن تكون من غير تكاليف خالص.. المهم إن ملخصها إن النهارده يوم بتاعك وفي آخره هتلاقيني مستنيكي.. متتخيلش الفكرة دي ممكن تفرحها إزاي.
أكيد مديرها أو مديرتها أشخاص معروفة بالنسبة لك وبترغي عنهم طول الوقت.. اتصل بالمدير واطلب منه أجازة ليها.. ولو منفعش يبقى الخطة هتبتدي بعد الشغل مباشرة وهتبعتلها ع الشغل أي حاجة بتحبها الصبح معاها جواب فيه تعريف بالمفاجأة.. مثال: "صباح الخير يا حبيبتي.. ابتدي يومك بالشوكولاتاية دي ولما تخلصي شغل هتلاقي ريسيت حجز لسبا ومساج –مشطوب منه السعر- روحي ريحي واتبسطي.. أنا سايبلك هدومك وحاجتك هناك.. متقلقيش البنوتة أنا اللي هجيبها من الحضانة وهوديها لمامتك عشان نخرج بالليل.. البيت هيكون نضيف والمواعين معمولة.. مش مطلوب منك النهارده غير إنك تتبسطي.. بحبك".
هتلاقي عروض كتير لأماكن السبا والمساج بمناسبة الفالنتاين، وممكن تلاقي حاجات كويسة ومش مكلفة، استعين بصحابها البنات عشان يدلوك أو إخواتها.. ومش لازم عشان تكون مثالي تنضف البيت بنفسك، زود على ميزانيتك 100 جنيه وهات واحدة تقوم بالمهمة.. وبالليل قابلها في البيت اللي مستنيها فيه أكل سخن وحلو أو في المطعم اللي إنت حاجز فيه.. ظبطها حسب ميزانيتك.. المهم التكتيك.
2- مين الست اللي مش عاوزة تسافر؟!
أنا عمري ما شفت واحدة مش عاوزة تسافر! لا حقيقي يعني.. كل الستات من كل الأشكال والأجناس والخلفيات الثقافية.. اللي شغالين واللي ستات بيوت.. كلهم هيموتوا على السفر والفسحة وإنهم يشوفوا أماكن جديدة.
إنت وميزانيتك بقى.. تقدر توديها تركيا؟ متستخسرش وظبطهالها ع الفالنتاين وخلوها 5 أيام.. وزي ما شرحت مسبقًا ظبطلها أجازتها بنفسك أو وجود الأولاد مع حد من أهلكم.. تقدر تاخد داي يوز في العين السخنة؟ حلو جدًا.. شوية شمع وكب كيك عليه رقم عدد السنين اللي قضيتوها مع بعض ع البحر هيخلوها طايرة من السعادة.. في البرد ده ممكن تفكر في الأقصر والأسوان، ولو إنهم محتاجين أكتر من يوم عشان بُعد المسافة.
لو مفيش فلوس للسفر ممكن تدور على أي مكان عمركم ما رحتوه وكان نفسها تروحه وتعملها خطة وتوديها.. الأزمة الحقيقية لو إنت متعرفش هي بتحب إيه أو عاوزة إيه، لوم نفسك شوية إنك مش قريب من أفكارها وبعدين اسأل أنتيمتها هتقولك.. عمومًا الصحاب بتساعد أوي في التخطيط، والفالنتاين فرصة حلوة إننا نقرب من اللي بنحبهم بحاجة أكبر من المظاهر.
3- تذكرتين أي حاجة
علبة صغيرة وفيها تذكرتين أي حاجة.. فيلم حلو في السينما.. حفلة في الأوبرا.. مسرحية في واحدة من المسارح اللي محدش بيركز معاها وكتير بيبقى فيها حاجات ممتعة.. وممكن كمان تبص ع الجدول بتاع صندوق التنمية الثقافية اللي بيعمل حفلات حلوة جدًا وكتير منها بيكون مجاني.. المهم في النهاية تقولها البسي فستان حلو ويلا بينا.. في الحقيقة هتكون الأمسية ألطف لو تجسست على دولابها وعرفت مقاسها وجبتلها إنت الفستان.. هتتبسط أوي باللفتة، ومتقلقش من الأذواق، متبدعش أوي، السادة لم يفقد رونقه بعد.. فستان سادة بلون بتحبه هيكون عظيم.
4- حسسها إنك رفيق الرحلة
مش كلام رومانسي عبيط، بس الدعم من أحلى الهدايا اللي ممكن تتقدم لواحدة بتحبها.. يعني مثلاً لو بتحب التصوير اشتريلها كاميرا -حتى لو مستعملة أو بالتقسيط- لو عندها كاميرا دورلها على كورس فوتوجرافي.. لو بتحب اللغات احجزلها كورس فرنساوي أو أسباني أو حتى صيني.. لو بتحب اليوجا وعمرها ما راحت دوّر على كورس واحجزلها.. لو سايبة شغلها بقالها فترة ومحبطة دورلها على كورس أي حاجة ممكن تعجبها عشان تتعلمها.. لو بتحب المزيكا اشتريلها آلة واسأل على أماكن التعلم أو حتى كورسات اليوتيوب.. لو بتحب السفر وإنتو الاتنين عينكو بصيرة وإيدكو قصيرة اشتريلها كرة أرضية كبيرة وحط دبابيس على كل الأماكن اللي نفسها تروحها وحضرلها خطط تخيلية لكل سفرية.. دي هدية مش محتاجة أكتر من سيرش على جوجل، ورغبة حقيقية إنك تفرحها.
5- أفكار عامة وتفاصيل
ممكن جدًا الفالنتاين ييجي وقت زنقة وميكونش معاك فلوس لخطة كبيرة.. اشتري علبة وانفخ بلالين واربطهم مع بعض بربطة وخبيهم جوة العلبة.. لو الدنيا مش مزنقة أوي خليهم بلالين هيليوم عشان يطيروا أول ما العلبة تتفتح.. وحطلها كرت تحت البلالين مكتوب عليها "تحبي تخرجي معايا ناكل آيس كريم ونتمشى؟".
ممكن تظبط قعدة في البيت في البلكونة مع أغانيها المفضلة.. وتعملها حاجة تشربها وتجيب كيس مارشميللو وتقعدوا تشووا مارشميللو بالولاعة وتاكلوه وهو سايح وتضحكوا.. ممكن لو عندكم قطة أو كلب تستغلهم في توصيل رسالة رومانسية ليها الصبح أو أول ما ترجع من الشغل.. ممكن تخبيلها هدايا عبيطة أوي من محلات اتنين ونص في كل حتة في الشقة وتسيبلها إرشادات عشان توصلها.. ورا الكنبة توك ملونة، جوة التلاجة حلق، تحت السرير ميدالية، وتحت علبة الشامبو وايبس باللافندر.. مش عارف جبتها ليه بس قلت أكيد هتفيدها، ممكن تبعت جواب ع الشغل ورسايل مع كل الأوفيس بويز.. اعمل زيارة لمكان شغلها قبلها بيوم ووصي كل ما حد يشوفها يسلم ويقولها فلان بيحبك وفرحان إن إنتي في حياته وبيقولك كل سنة وإنتي طيبة.
