في الوقت الحاضر دايمًا تجمّع أفراد العيلة والأصحاب بقى صعب بسبب ظروف الحياة. وبقينا نستنى الأعياد للتجمع. لكن كتير من المضيفين بيأكدوا عدم استمتاعهم بالحفلات لاهتمامهم براحة الضيوف. النهارده هنتكلم عن تحضير حفلة كريسماس ناجحة وممتعة للمضيف والضيوف.
دي مجموعة ملاحظات لو خدنا بالنا منها هتسهّل لنا اليوم وهتخلينا متألقين وسط ضيوفنا.
أولاً:
لازم تحددي المدعوين للحفلة وتعرفي فيه أطفال ولا لأ، وتتصلي تعزميهم قبل الحفلة بوقت كافي.
ثانيًا:
لازم تحددي المكان اللي هتتعمل فيه الحفلة ويكون مجهز لراحة الضيوف بعدد مقاعد كافي ووسائل تدفئة وأماكن مناسبة للأطفال، مع مراعاة تجهيز الحمام بعدد كافي من الصابون والمناشف.
اقرئي ايضًا: قصة فيلم كلاوس وأساطير بابا نويل ؟
ثالثًا:
لازم نحضّر قايمة عشاء ومقبلات تكون متنوعة وسهلة الإعداد، مع تجهيز أدوية للبرد والكحة وشنطة إسعافات أولية في مكان قريب، عشان -لا قدر الله- لو حصلت أي حادثة مفاجأة نكون مستعدين.
رابعًا:
لازم نهتم بوجود ديكورات وأكسسوارات يغلب عليها الألوان المميزة لزينة الكريسماس، ونكون محضرين شجرة كريسماس كبيرة ونعلق عليها أنوار وألعاب، وجنبها شنط هدايا السنة الجديدة، وندّي لمسة حيوية للبيت بزهور البوانسيتيا الحمرا سواء كانت طبيعية أو صناعية. كمان متوفر دلوقتي في المتاجر مفارش للسفرة وأطباق ومعالق ومناديل ورقية مرسوم عليها أيقونات الكريسماس المميزة.
خامسَا:
لازم كل التجهيزات دي تكون جاهزة قبل الحفلة بيومين على الأقل لأن قبل الحفلة بيوم هنكون مشغولين في إعداد قايمة العشاء والمقبلات.
ودي قايمة بأهم الوجبات الرئيسية والمقبلات المناسبة لاحتفالات الكريسماس:
- الأطباق الرئيسية لحفلة الكريسماس بتعتمد بشكل رئيسي على المشويات اللي بتتنوع ما بين الديك الرومي أو الريش المشوية أو الوز المشوي، كمان ممكن نحضّر فخدة ضاني مشوية لو العدد كبير.
- الأطباق الجانبية مهمة جدًا لأنها بتبرز قيمة للطبق الرئيسي، وأفضلها على الإطلاق الخضراوات المشوية والطواجن المتغطية بعجينة البف بيستري ومخبوزة في الفرن، والسلطات الدافية.
- المقبلات أهميتها متقلّش عن أهمية الوجبة الرئيسية، وأفضل المقبلات المناسبة كوكتيل الجمبري، وكورات الموتزاريلا المقلية، والميني بيتزا، والميني تارت اللي ممكن نعمله بعجينة البف بيستري.
- مفيش حفلة من غير حلويات.. وأهم الحلويات المناسبة للكريسماس غير تورتة الكريسماس هي البافلوفا اللي بتتعمل من المارينج الأبيض، وفطيرة الفواكه، والكمثرى المسلوقة في الشراب السكري، والتفاح المخبوز، والجزر المغلف بالعسل.
- المشروبات كمان مهمة جدًا، وأهمها الهوت شوكليت والآبل سايدر، وكمان كوكتيل الفواكة والعصاير الطبيعية.
ولو راعينا الملاحظات دي ورتبنا أمورنا بحيث ما نقضيش يوم الحفلة كله في المطبخ هنقدر نقضي حفلة كريسماس ممتعة وتكون ذكرى متتنسيش أبدًا.
وسنة سعيدة علينا كلنا..
