شوفت ربنا؟!

1435

 

بقلم/ منة مدحت

“ياه يا أخي! شوفت ربنا؟!”

الجملة دي يمكن بنقولها أوقات كتير وإحنا مش مركزين في معناها، لما حد يحكيلك حاجة حصلت بطريقة غريبة، أو موقف حصل بترتيب غير متوقع عشان تحصل حاجة معينة في النهاية، الحقيقة إنه ساعتها بنركز قوي في التدبير اللي حصل وبتطلع مننا بكل تلقائية “شوفت ربنا؟!”.

طيب ليه منركزش في كل التفاصيل اللي حوالينا ونشوف ربنا فيها، رحمته، ورعايته، رضاه ولطفه وغضبه وانتقامه وقضاءه لكل أحوالنا.. لما بتحصل حاجة بتضحكنا أو تبسطنا، هي منه، ولما تحصل حاجة تزعلنا دي منه، وإنت عليك إنك تركز وتفكر ليه حصلت؟

لو ركزنا أكتر إننا نشوف ربنا، حاجات كتير قوي هتختلف فينا، إحساسنا بنفسنا وبالحياة وطريقة تعاملنا معاها، هنكون أهدا وأكثر تقبلاً لكل حاجة، هنكون أكثر رغبة في إننا نشوف ربنا في كل حاجة حرفيًا في حياتنا، هنشوفه في النعم اللي عندنا، من أول قدرتك على إنك تقرأ الكلمات دي لحد وجودك في حد ذاته.

جرب تشوف ربنا في كل حاجة بتحصل في حياتك، في العلاقات والحب والشغل والدراسة والانبساط والنجاح والفشل والناس والمواقف.. كل حاجة في حياتك بدون استثناء، هتلاقيه دايمًا موجود وقاصد يوصلك رسالة من أصغر حاجة بتحصل لأكبر حاجة.. فكَّر كان عايز يعلِّمك حاجة، ولا كان عايز يختبر فيك حاجة، ولا كان عايز يوجهك في اتجاه معين إنت مكنتش هتروحله من غير الحاجة اللي حصلت؟ أو ممكن كان عايزك تقابل ناس معينة -لو ركزت- هتتعلم من مقابلتهم حاجة، ممكن تتعلم صفة جديدة، أو ممكن عايزك تعرف حاجة معينة من خلال الشخصية دي.

إنت كمان وجودك في حياة اللي حواليك مش عبثي، إنت كان مقدر إنك تقابلهم وتحصل بينكم مواقف مقصودة، فكر ممكن يكون ليه، جرب اسأل نفسك أو حتى الناس القريبين ليك تأثيرك إيه فيهم أو إنت بتمثلهم إيه.

ولو حاولت بس معرفتش تشوفه في حاجة معينة في حياتك، ده مش معناه إنه مش موجود فيها، بالعكس.. دي أكبر حاجة هو موجود فيها، لأنه هو اللي عارف السبب وراها، وهو اللي مدبرها بطريقة إنت لسة بتحاول تفهمها، وكمان مش معنى إنك عارف تشوفه في حاجة معينة إنه موجود فيها بالنسبة اللي وصلتلك بس.

صحيح لو ركزنا هنعرف، بس هنعرف جزء صغير، نسبته هتختلف على حسب ما ربنا عايزك تعرف وتشوف حكمته، لكن مهما عرفنا من علم ربنا وطريقة تدبيره في حياتنا إحنا هنفضل مش عارفين إلا جزء ضئيل جدًا منها، لأننا مش مقدر لينا نعرف كل حاجة في الدنيا هنا.

البصيرة اللي هتخليك تشوف ربنا مش هتتوجد بين يوم وليلة، ومش بسهولة هتكونها.. الرحلة دي ممتدة طول حياتك لحد نقطة النهاية.. لما تشوف ربنا.

فكَّر كان عايز يعلِّمك إيه وكان عايز يختبر فيك إيه

المقالة السابقةتعرفي على ما هو الاورجازم ؟ حقيقة الاورجازم عند النساء
المقالة القادمةمهرجان السبلايز
مساحة حرة لمشاركات القراء

ترك الرد

الرجاء إدخال تعليقك!
الرجاء إدخال اسمك هنا