بقلم/ ياسمين محمد فتحي
معروف طبعًا إن كل الرجالة الشرقيين لما يتحمقوا قوي وتاخدهم الجلالة بيقولوا “لا ده أنا الراجل.. أنا راجل ونص وتلات أرباع”.
فكرت كتير لو كنت راجل كنت هعمل إيه! إيه الحاجات اللي مش شايفاها موجودة في رجالة اليومين دول ونفسي ينزل منهم إصدار جديد فيه الأوبشنز دي! لو كنت راجل يا ترى كنت هبقى راجل بجد ولا نص ولا تلات أرباع؟
فيه راجل كامل قولاً وفعلاً، فاهم القوامة صح والمسؤولية كما يجب، وعنده مبادئ ثابتة لا تتبدل حسب الموقف.
وفيه تلات أرباع راجل، برة وجوة البيت تصرفات معقولة وموزونة جدًا كموظف وكأب، وييجي عند المشاكل والأزمات العائلية وطريقته مع زوجته ويهنج.
وفيه نص راجل، برة البيت هدوء اتزان حكمة ابتسامة.. جوة البيت زعيق عجرفة همجية بوز.
وطبعًا فيه رجالة اسمًا فقط، لا يحملوا من رجولتهم سوى صفة الذكورة، ودول برة الحسبة لأن مفيش منهم رجا.
من منظوري شايفة إن الراجل سبب كبير في إدارة العلاقة، ويقدر بذكائه ورجولته يوصلها دايمًا بر الأمان، زي ما يقدر برضو إنه يخرق السفينة ويغرق أهلها.
عشان كده لو كنت راجل كنت هعمل حاجات كتير رجالة مجتمعنا الشرقي مبيعملوهاش، لأن من وجهة نظرهم بتتعارض مع رجولتهم، رغم إنها في الحقيقة هي الاعتماد الحقيقي لرجولتهم.
لو كنت راجل.. مكنتش هبقى مصدر سلبية وإحباط لزوجتي لحد ما تنطفي ونورها يختفي، وبعدين أفضل أسأل نفسي هي مالها؟
لو كنت راجل.. مكنتش هرمي حملي وحمل عيالي ومسؤولياتي على مراتي وأتهمها بالتقصير.
لو كنت راجل.. أكيد كنت هتخانق مع مراتي، (ما هو هتبقى وسعت قوي لو قلت مكنتش عمري هتخانق مع مراتي) بس كنت هعرف أدير الأزمة، نختلف ماشي.. بس نعدي الخلاف ونخرج منه أحسن.. منطولش الخلاف عشان الطرفين ميوصلوش لمرحلة النفور من بعض.. مندخَّلش أطراف في خلافاتنا ممكن تتسبب في اتساع حجم المشكلة والفجوة بينا.
لو كنت راجل مكنتش هضيَّع أي مناسبة إلا وأعملها تلكيكة لصلح.. لتجديد وصال.. لتجاوز أزمة.
لو كنت راجل.. مكنتش مهما كان الخلاف بيني وبين زوجتي هحرجها أو أكسفها لو جت تصالحني.. مكنتش هبقى سبب إني أعلمها القسوة، وأدربها مع الوقت تعيش من غيري وتتأقلم على الوضع ده ومتحسش إن وجودي له أهمية وعنصر الاحتواء منعدم في العلاقة!
لو كنت راجل.. مكنتش هاجي على زوجتي أو أجبرها على حاجة هي مش عايزاها، وأحطها في خانة اليك، وتضطر تقبل وتنكسر لأن معندهاش حل تاني.
لو كنت راجل.. مكنتش هعامل زوجتي على إنها تيشرت أو بيجامة في البيت أستخدمها وقت ما أحب ألبسها أو أركنها في الدولاب شهور لو زهقت منها.
لو كنت راجل مكنتش ههرب طول الوقت من النقاش والمواجهة عشان فاكر إن دي فهلوة ونصاحة وكله بيعدي ويتنسي، وبعدها أتفاجئ إن زوجتي خلصت كل رصيدي من تضحيات وتنازلات، وإن فاتورتي تقلت جدًا وبقت مستحيلة السداد.
لو كنت راجل.. مكنتش هدمر بيتي بإيدي وبعدين أستغرب قوي هي مراتي مصرة علي الانفصال ليه؟!
لو كنت راجل كنت كل يوم هحاسب نفسي قبل ما أنام وأسأل نفسي يا ترى أنا رجل ولا نص ولا تلات أرباع؟!
