بقلم/ وفاء مرزوق
تعريف الخوف ببساطة: هو شعور بيحصل نتيجة تهديد أو خطر، ومواجهة الخطر ده بيكون إما عن طريق المواجهة أو عدمها Fight or Flight.
الخوف أنواع: نوع عقلاني “منطقي” ونوع غير عقلاني “غير منطقي”.
فيه أسباب كتيرة قوي بتسبب الخوف للإنسان: الخوف من الأماكن المفتوحة، الخوف من الأماكن المغلقة، الخوف الاجتماعي (من الناس)، خوف من الأمراض، خوف من الموت، مخاوف من الظلم، الفشل، الظواهر الطبيعية، الأماكن العالية، الأماكن المُظلمة… سلسلة لا نهائية من المخاوف المتعددة واللي بتزيد كل يوم.
الحقيقة مش عايزة أطرح فكرة الخوف العقلاني أو اللي له أسباب حقيقية، لأن الخوف وقتها بيحافظ على الحياة، يعني لما تخاف من حيوان مفترس هتجري بأقصى سرعة عندك عشان تنقذ حياتك “رغبة البقاء” و”التعلق بالحياة”.
لكن اللي عايزة أطرحه هو الخوف اللي مش مبني على أسباب منطقية أو حقيقية، لكن على تخيلات أو افتراضات.
الخوف.. الكلمة اللي مغلفة كل حياتنا تقريبًا.. قرارتنا.. خطواتنا.. تفكيرنا.. حتى معرفتنا.
الخوف قيد كبير قوي وحِمل تقيل جدًا، قيد خفي مش متشاف، عامل زي وهم الشبح اللي في الأوضة الضلمة، كلنا عارفين إن مفيش شبح مستخبي في الضلمة لكن برضو بنخاف؛ معرفتنا العقلية أحيانًا مش بتكون كافية عشان نتغلب على خوفنا.
بنخاف من كل حاجة وعلى كل حاجة.. بنخاف على شكلنا، نظرات الناس لينا، تقييمهم لينا، قبولهم من عدمه،
لما بنفكر في فكرة جديدة بينا وبين نفسنا بنخاف، بنخاف من رد فعل الناس، هيقبلوا الفكرة ولا لأ، هيتقال علينا إيه بعد ما نعرض فكرتنا، احتمال نطلع مجانين في نظرهم، أو هايفين، فطبعًا بنخاف.
لما بناخد قرار، خوفنا من كونه صح ولا غلط بيكون أقل من خوفنا من كونه ماشي مع المُعتاد ولا لأ.. بنخاف.
بنخاف نسأل، وخصوصًا لو سؤالنا متعلق بثوابت ومعتقدات من سنين.. بنخاف نخرج برة المُعتاد وبرضو منطقة راحتنا اللي ممكن تكون وهمية “حتى الوهم ممكن نكون بنخاف عليه”، بنخاف لما نسأل نفكر ونتلخبط وبنخاف أسئلتنا ميكونش ليها إجابات.. فالأفضل منسألش.
بنخاف نقعد مع نفسنا.. يمكن عشان منكتشفش جوانب بنحاول نهرب منها.
مش مشكلتي في الخوف لأنه مشاعر طبيعية وموجودة ومشروعة كمان، الخوف إن يتحول الخوف الطبيعي لخوف مرضي، الخوف المفروض يخليك تعمل أحسن ما عندك، مش يخليك متعملش حاجة خالص وتقف عند مرحلة التفكير والخوف، وتنتهي بعدم تنفيذ أي حاجة في حياتك.
متخافش من خوفك لما يكون طبيعي، خاف لما يكون بيقيدك ويحدك ويعطلك ويشل كل حركة فيك ويقضي علي حياتك بالبطيء.
عارف كمان تخاف إمتى؟ تخاف لما ميكونش عندك حاجة تخاف منها.. خاف من خوفك، وفي نفس الوقت متخافش منه.
الخوف العقلانى واللا عقلاني
