بقلم/ وجدان جمال الدين
الدنيا تلاهي.. بس فيه حاجات بتعلِّم في الواحد، العلاقات اللي مبيكونش حاسس فيها بالأمان. إنت طول الوقت بتبرر، بترهق نفسك في احتمالات، بتتهلك مع الوقت وبتهدر طاقتك، بتثبت حسن النوايا. العلاقات اللي من النوع ده سواء بين الأصدقاء أو الأزواج أو أي حد بتهلك صاحبها، بتهلكه فعلاً ومبيتبقاش منه حاجة. إنت طول الوقت فكرك مشغول، معندكش فرصة حتى ترفع راسك وتفكر في حالك، مبتتنفسش كويس، مبتنامش، مبتاكلش، إنت عايش حياة شخص تاني مش حياتك.. انهوها فورًا.. انهوها ووفروا طاقتكم لنفسكم ولحياتكم اللي بتعيشوها؛ العلاقات من النوع ده إنهاك وانتهاك لآدمية البشر.
الحاجات اللي بتعلم بقى إن فكرة “إزاي جالها قلب؟/ إزاي جاله قلب؟” يعمل كده، جاله قلب ميسألش بالأيام ويمكن الشهور.. جالها قلب متطمنش عليّ في الوضع أو الحالة دي، جالهم قلب يقاطعوك في عز احتياجك وعز ضيقتك، الافتراء عمومًا وجبروت الإنسان مبيتعرفش غير وقت ضعف، ومن مركز قوة، يعني وقت ضعف طرف الطرف التاني يقسو عليه بدل من إنه يحتويه ويطبطب عليه، لا يبدأ يستغل مركز قوته ويضغط بلا رحمة.
طبيعي جدًا إن اللي جوة القصة دي ممكن يكون مشوش ومش شايف كويس، ومش واقف علي حقيقة الموقف ولا مدرك إيه المشكلة أصلاً، وده ببساطة لأن Love is blind الحب أعمى! الحب ده مش شرط بين راجل وست زي ما نوهت قبل كده، لكن فعلاً بيبقى معمي مش شايف ولا بيفكر غير من جوة مخ الطرف التاني، أرضيه إزاي، وإزاي يفرح، إزاي يكون سعيد وراضي عني. أما عن نفسه فحدِّث ولا حرج بيبقي حرفيًا ناسي نفسه، وده اللي بنتكلم فيه.
قمة الظلم والقهر لما يتم استغلال إنسان ربنا خلقه جميل ولهدف أسمى وأنقى من اللي إحنا ممكن نشوف بعضنا بيعمله في البعض.
وصدقوني.. وقت ما الحب بيخلص والطرف التاني ده بيفوق من اللي كان فيه بيبقى عامل زي آخر نفس بيشهقه غريق كان علي وشك الموت وتم إنقاذه، بيبدأ يتفرج على اللي بيحصل من فوق ويقيم العلاقة كويس، ويقف ويدرك أبعاد الوضع ده، ويحس قد إيه اتظلم، ويشعر بكم إهانة لاستغلاله بالشكل ده، ولو كان فاضل فيه لسة طاقة أو فهم. اللي بيحصل بدري قبل فوات الأوان، بيبقى رد فعله عنيف وقاسي لأقصى درجة، هو بيبقى عاوز ينتقم لإنسانيته ولعمره ووقته وطاقته وكل حاجة ضاعت وأهدرت، بسبب بس إن نيته كانت حلوة وإنه بيحب الطرف الآخر وكان بيقدم فروض الولاء والطاعة.
اصحى قبل فوات الأوان. خد أجازة. اتنفس. بص حواليك كويس، قيم نفسك وقيم علاقاتك.. خليك عادل مع نفسك ومع غيرك.
أي علاقة.. مش لازم بين راجل وست
