أ ب كيميا وفيزيا وأحياء بتقول إن عشان الواحدة تبقى حامل ده بيحصل نتيجة علاقة بين اتنين. بس لو فاكرة إنك عشان كده يبقى الطفل ابنك أنتِ وشريك حياتِك لوحدكم تبقى غلطانة.. هأو.
في دايرة معارف كل ست حامل نماذج كتير بتتحشر وتعلق تعليقات سلبية بطرق مختلفة، وبتتدخل ف أدق التفاصيل بمنتهى البجاحة والثقة تحت مسمى: ده مش ابنك لوحدك! أنتِ بس تخلفي وتأكلي وترضعي وتغيري وتطلع عينك وأحنا هنبوظ كل اللي بتعمليه ونِنَظَّر ع اللى خلفوكي.
فيا حضرة الحامل: يُفضّل لو حضرتِك شخصية مبتحبش التدخل في تفاصيل حياتها تبقي حازمة من الأول عشان محدش يسوق فيها، بس في نفس الوقت لازم تفرقي بين الناس اللى بتنصحك عن حب وبأسلوب لطيف أنتِ متقبلاه، والناس اللى بتغلَّطك ع الفاضية والمليانة، والأهم يكون عندك مصدر للمعلومات عشان لو حد قدملك خدماته الجليلة باعتبارك معندكيش خلفية تقدرى تعرفيه أنك قارية وفاهمة ومركزة.
التدخل أثناء الحمل بيبقى ف أكثر من شِق:-
1- من خلال السؤال عن تفاصيل من حقك تبوحى بيها أو لأ. زى مثلًا: أنتِ حامل في ولد وللا بنت!؟
لو قولتي: مش عارفه لسه، معناها أنه ولد وأنتِ مخبية عشان الحسد، أما لو قولتي: بنت، ففيه احتمال إنه ولد وأنتِ بتكدبي عشان الحسد..برضه.
ثم ليه تعتمدي على السونار لما ممكن تعتمدي ع الطب البديل!!
وده بيكون عبارة عن: طالما مناخيرك كبرت ووشك اتنفخ وأوحشيتى يبقى ولد، لكن لو محلوة فدي بنت، وممكن ناس تحددلك جنس المولود حسب بطنك تخينة بالطول وللا بالعرض. لكن لو بطنك كبيرة يبقى توأم بس مش باين ف السونار..عادي.
وطبعًا لو طلعتى حامل في بنت هيتقالك اعملي حسابك المرة الجاية ولد، أما لو حامل في ولد هيتقالك متقوليش لحد، اللي يسألك قولي البيبي مدينا ضهره فمش عارفين.
خلصنا من نقطة ولد وللا بنت ندخل في هتسموه إيه؟
لو مقولتيش يبقى مش عايزة حد يعرف، أو مخبية الاسم أحسن يتسرق، ولو قولتى الاسم هتلاقي كل من هب ودب بيقولك رأيه ومش بعيد يقولك غيريه عشان مش عاجبه.
ووارد جدا ناس يقترحوا عليكي أساميهم الشخصية كاسم للمولود، ولو معجبكيش تبقى دي قلة ذوق منك طبعًا، وتوقعي أنك هتلاقي اتصالات طول الحمل من ناس تطوعت وفكرتلك ف اسم حلو للبيبي لازم تسميه.
2- التدخل ف اهتمامك بصحتك وأكلك ووزنك، أنتِ مش بتاعة نفسك ياماما أنتِ شايلة دلوقتي، يعني الحاجات اللي مبتحبيهاش تاكليها غصب والتفاهات اللي بتحبيها تبطليها ودايمًا فيه حد شايفك بتدلعي دلع ماسخ..اكبري شوية.
وأخيرًا: الدكتور اللي بتروحيله واللي غالبا هيتقالك مش فاهم حاجه، لو دكتورك راجل هيبرروا جهله بمقولة: يعنى هو كان حِمل قبل كده! أما لو دكتورة فهيتقالك مفيش دكتورة ست بتفهم من أساسه.
مــــ الآخر عمرك ما هترضي كل الأطراف.. إحنا مجتمع حشري بطبعه، بيسمح لنفسه يركب حياة الآخرين ويدلدل تحت مسميات زى القرابة والصداقة والعشم وأنك تقفي ف وش ده وتوصلي للآخرين رسالة مفاداها “دي حياتي” هتاخدي وقت وكلام زي الرصاص بس ده طبيعي ومتوقع فمتستسلميش.
لازم تُصري أنك تخلي تجربة الحمل ذكرى جميلة تفتكريها بابتسامة عشان لو يوم كررتيها تاني متبقيش قلقانة ومتكدرة، فمتسمحيش لحد يوترك ولا يعكَّر مزاجك واستغلي بإيدك وأسنانك فرصة إن عندك كارت بلانش للدلع وفرض حدودك وسيطرتك خصوصًا ف أول حمل ليكي.. وربنا يقومك بالسلامة.