الحب هو..

1726

معني الحب إيه؟
بين كل حكايات الحب الأسطورية والقصص الملهمة الموجعة عن الحب واللي بيحبوا، هيفضل للحب 100 معني وشكل ولون، هيفضل
للحب تعريف شخصي جدًا جدًا عند كل إتنين بقوا واحد بالحب.
الأفلام من زمان قالتلنا إن الحب هو ورد وجواب ونظرة عين معينة ونهاية سعيدة بفستان أبيض وبدلة.  آه وبعدين؟ بعد مرحلة الجوابات
والهدايا والكلام المتزوق بحب، ليه بنسمع عن قصص أسطورية بتبدأ باللي فات وتنتهي بالفشل والبُعد؟
هو ده فعلاً الحب بس؟ هو فعلاً صور الفيسبوك السعيدة وبوستات الغرام 24 ساعة، حب؟

"حبّ إيه اللي إنت جاي تقول عليه.. إنت عارف قَبلا معني الحب إيه؟".. سؤال سألته أم كلثوم من سنين السنين ولسّه إجابته تايهة ما بين
القلب والعقل.
تعالوا نبدأ الحكاية من الأول، من أول زقزقة في القلب لابن الجيران أو زميل المدرسة، أول جواب وأول وردة في الكتاب، وأول وعود
بدايتها "للأبد للأبد".. بس بعد شوية بنكبر ونكتشف إن الحب مش كده، أو بمعنى أدق مش كده بس.
الحب = مسؤولية وأمان واحتواء وجنان ووجع.. كوكتيل بنفضل ندور عليه لحد ما نلاقيه.. المحظوظ مننا هو اللي بيلاقيه باكيدج كده.

أنا كنت متخيلة إن الحب كلام حلو ومفاجآت وتعبير دائم عن المودة والغرام.. بس مع الوقت جربت حبّ الكلام وجربت حبّ الأفعال،
اتوجعت جدًا في مرحلة ما في حياتي عشت فيها رومانسية حب الأفلام الحالم، واتعلمت وقتها إن مش ده بس الحب، وكنت بسمع
حواديت أصحاب حواليّ عن الحب وحكايات اتصدمت بنهايتها وأخرى اتفاجئت باستمرارها.. ووقتها قررت إن تعريف الحب ده حاجة
مينفعش تتكتب ولا يتحطلها كتالوج، بالعكس.

عرفت إن الحب ممكن يكون مسؤولية من الطرفين بإنهم يتمسكوا ببعض ويكملوا حكاياتهم بشجاعة.
الحب مبيغيرش حياتك، الحب بيغيرك إنت نفسك. بيحفظ كرامتك وشخصيتك وطموحك.. وما عدا ذلك حب آه لكنه حب تملك فقط.
اللي بيحب مبينساش مهما عدت سنين، وبيسامح في وجعه بس ميقدرش يسامح في وجع اللي بيحبه.
الحب مش دايمًا هدايا وكلام متزوق، ممكن يكون فنجان قهوة مظبوط من غير ما تطلب، أو غسيل شوية أطباق في المطبخ وقت التعب،
أو مدح أكلة نص نص عشان بس مجهودك فيها.
الحب هو إن في عز الخصام، ممكن تقلقي تلاقي حد بيغطيكي عشان متبرديش.
الحب هو قايمة أحلام مشتركة بتحققوها سوا، مش قايمة فرش ومعالق ومفارش بتهددوا بيها بعض.
الحب هو نظرة محدش غيركم بيفهمها وإفيهات مشتركة عن الحياة واختلاف في التفكير بيكمل بعضه، زي الـPuzzle.
الحب هو لحظات الهبل والجنان والضعف اللي مبنتكسفش منها قدام حبايبنا، أسرارنا اللي بنحفظها في قلوبهم وكأنها جوانا.
اللي بيحب فعلاً بيساعد ويشجع ويدعم اللي بيحبه إنه يكون أحسن وأقوى، الحب طرفين فخورين ببعض ومصدقين بعض جدًا.
مش لازم تكونوا شبه بعض 100% أو شبه بعض أصلاً، في الحب المهم تكونوا بتكملوا بعض.
التفاصيل حب، والحفاظ عليها مع مرور السنين أعلى درجات الحب.
الحب مش صور سعيدة وبس، لكنه لمّا تبص للصور وتبقى متأكد إن اللي فيها نصك التاني اللي مينفعش الصورة وحياتك تكمل بدونه.
الحب هو إنك تحط إيدك على قلبك وتقول "الحمد لله"، وتحس إن قلبك دافي ومليان ومطمن.
الحب هو إن رغم بُعد المسافة، لكن دعواتكم بتوصل للسما في نفس اللحظة اللي بتقولوا فيها "آمين".
الانتصارات الصغيرة، السند وقت الضعف، الحضن وقت الحاجة، هو ده الحب اللي بنكتشف مع الوقت إنه مش محتاج يوم عيد، وإن
وجوده في قلوبنا في حد ذاته عيد.

"وإن كان أمل العشاق القرب أنا أملي ف حبك هو الحب".

المقالة السابقةعن الحب الأول.. الساذج
المقالة القادمةمستر محمد فؤاد
كاتبة وصحفية مصرية

ترك الرد

الرجاء إدخال تعليقك!
الرجاء إدخال اسمك هنا