بقلم/ آلاء السقا
تقييمنا لجمال غيرنا أيًا كان إيه هو، شيء، شخص، أو أي كائن، أو ظاهرة، بيعتمد على تمييزنا للحاجة دي على المستوى الحسي والمعنوي، ومدى تأثرنا بيها.
زي ما بسمع دايمًا كلمة صحيحة جدًا، إن "الجمال نسبي"، ممكن أنا أحس بجمال حاجة معينة وأبقى منبهرة بيها، غيري يشوفها عادية جدًا مش مؤثرة معاه ومش شايف فيها أي جمال.
الجمال مش اتفاق، معنديش القدرة أجزم بإن ده شخص جميل.
وأقف وأنهي القضية عند النقطة دي، لأن ده تعميم، وفرض رأي خاص بيَّ على آراء غيري المختلفة عني ومستواهم الحسي والمعنوي ورؤيتهم مختلفين عن مستوايا الحسي والمعنوي ورؤيتي، كأني بتكلم بالنيابة عن ذوق الجميع.
كل ده بعيدًا عن إن ساعات كتير الثقافة بتتحول لمشكلة ثقافية وتأثر علينا وعلى رؤيتنا وانفعالاتنا، وتخلينا نحكم على جمال الحاجة بشكل غلط، ومنشوفش الجمال الحقيقي "بالنسبة لينا".
الجمال مرتبط بالرغبة، لما يكون عندنا رغبة في حاجة معينة عشان شايفينها جميلة بالنسبة لينا، أو العكس، ممكن نشوفها جميلة عشان رغبتنا فيها.
ومرتبط برضو بشوية حاجات تانية، زي الإحساس والشعور والفِكر والثقافة والإرادة والقيم وسلوك اللا واعي، وغيرهم.
لو فكرت ليه ممكن نقول على لوحة جميلة، وفي نفس الوقت رياضة معينة جميلة، وكتاب جميل، وقصيدة شعر جميلة، ومقطوعة موسيقية جميلة، وبنت جميلة... إلخ.
هنا كل فن من الفنون دي له لغته الخاصة اللي بتعبر عنه، واللي كل واحد فينا شايفها جميلة بنظرته المختلفة عن باقي الناس.
مثلاً أنا بحس إن أكتر حاجة بحبها في الفنون دي هي فنون الرسم، غيري ممكن يكون الرياضة.
بالنسبة لي الرسم جميل غير الجمال اللي شايفه غيري اللي بيحب الرياضة، وبالنسبة له الرياضة جميلة غير جمالها بالنسبة لي.
وده ميمنعش إني أكون شايفة كل الفنون دي جميلة، بس كل فن وله قيمته الجمالية "بالنسبة لي".
إحنا ساعات بنشوف إن ناس معينة جميلة جدًا وننبهر بيهم، لكن هما وغيرهم بيكونوا شايفين غير كده، لأنهم مشافوش الجمال اللي إحنا شايفينه فيهم.
كلنا فينا عيوب ومفيش حد كامل، والجمال غير الكمال، وبرغم علمنا بنواقص غيرنا لكن شايفينه جميل، والنواقص دي ساعات بتكون من أسباب جماله أو قبوله "بالنسبة لينا".
مش كداب اللي يقول لك "إنت أعظم واحد، وأحسن شخص، وأجملهم كلهم"، لأنه شايفك كده، وإنت بالنسبة له أحسن شخص فعلاً.. ومش معنى كده إنه شايف إنك ملاك أو مفيش فيك عيوب، ويكون وسيلة ضغط عليك بدل ما كان وسيلة دعم بحُبه ليك، هو بيكون شايف نواقصك دي من ضمن جمالك.
يعني من الآخر.. متلومش حد مش شايف جمال في حاجة جميلة بالنسبة لك، ومتلومش حد شايف جمال في حاجة إنت مش شايفها جميلة.. لأنه عمره ما هيشوفها زيك بالمللي.
