البحث عن إلهام

872

المشهد الأول
أوضة/مكتب، إضاءة جيدة، كوب قهوة/شاي/كوب أي حاجة كافيين، ورقة وقلم/لاب توب، مزيكا وكائن بائس باصص للورقة أو للشاشة
المنورة بصفحة ناصعة البياض!
المشهد التاني

نفس الكائن بيحاول، وبيحاول، يكتب كلمة ويمسح عشرة، والصفحة لسّة بيضاء ناصعة أو الورقة فيها شخابيط هلامية، والوقت بيجري
والـdeal line  مبيرحمش..
المشهد الثالث
ذات نفس الكائن بيدعو الله ببعض الإلهام (يا رب يا رب شوية إلهام بس، طبّ فكرة جديدة وأنا هتعامل معاها، يا رب طيب أنا حضرت
كل الأجواء أهو علشان ألاقي إلهام بس.. مفيش!)
فركش يا بنتي المشاهد السابقة دي كلها، إلهام مبتجيش بالقهوة والمزيكا والورق الأبيض.. إلهام بتيجي بمزاجها.
مأساة أي شخص بيشتغل في مجال بيعتمد أولاً وأخيرًا على الإبداع، يعني الفكرة طازة من دماغك للمتلقي، يعني مفيش روتين تمشي
عليه كل يوم من 8 : 2 الضهر، وشغل بيتقفل عليه باب المكتب وتمشي.. إنتي منهم؟ إذًا إنتي كمان بتدوّري على إلهام طول الوقت،
وهي ومزاجها بقي يا تيجي يا تعاند.
ولإننا أصحاب وبندوّر على نفس الهدف، فحبيت أشارككم شوية معلومات عن رحلتي في البحث عن إلهام.
مبدأيًا، مش هتلاقي إلهام في مكتبك في الشغل ولا في النوتة الملونة التحفة إللي مستنية إلهام تنور صفحاتها، مش هتلاقيها في المكتب
المترتب الوهمي ولا الوقت اللي إنتي رايقة ومستعدة تمامًا لاستقبالها فيه، إلهام أصلاً بتكره الترتيب المسبق والترقب والانتظار.
اوعي، تستجدي إلهام، وإلا هتبعتلك أقل القليل علشان تسكتك وخلاص، ووقتها عمرك ما هتبقي راضية عن النتيجة، نتيجة كدة بدون
توابل أو ملح وشطة.
الإلهام، الفكرة الحلوة المصحوبة بضحكة عريضة وتنطيط و(وجدتهااااا) وحماس يخليكي تنسي القهوة تفور ع النار أو تطلعي من الحمام
والصابون على وشك، أو على أقل تقدير تكتب في ضهر ورقة الحساب في المطعم.. بتيجي بس في الحالات التالية:
1- وإنتي نايمة، آه والله، الفترة اللي ما بين تعارفك على السرير ومجيئ أبو النوم، هنا بتزورك إلهام، ونصيحتي خلّي تحت مخدتك
ورقة، اكتبي اللي إلهام هتقولهولك مهما كان، علشان مع أول شقشقة للنهار هتنسي كانت بتقولك إيه.
2- اشربي قهوة وكافيين زي ما تحبي، آيوة وإنت بتغسلي الفنجان أو الكوباية هتلاقي إلهام بتنط فجأة، الفنجان مش هيطير، امسكي في
إلهام واتفضلي نفذي اللي بتقوله وبعدين ارجعي كملي غسيل.
3- المزيكا جميلة، خاصة لو بتسمعيها في الزحمة، وتحديدًا بقي لو في المترو ولا الأتوبيس ولا الميكروباص، إلهام كمان بتحب الزحمة
والناس والمزيكا، ها عرفتي هتلاقيها فين؟ في حكايات البشر حواليكي، مش أبدًا في المكتب المقفول عليكي.
4- هتلاقيها كمان مستخبية في الكتب، في القراية، في ورق المجلات والجرايد ومواقع الإنترنت وإعلانات الطرق والتليفزيون والراديو..
طبيعي في الوقت إللي مش بتزورك فيه، هي بتزور غيرك وبتطلع أحسن ما عنده، دوري عليها في كل جميل ومبدع حواليكي.
5- السفر، هتلاقيها بتضحكلك وسط تذاكر القطر أو تذاكر الطيران، إلهام طفلة بتعشق المغامرات، فاكرة أخر مرّة عملتي مغامرة كانت
إمتي؟
6- ارقصي، غيري في شكلك، انطلقي مع أصحابك وانسي إلهام شويّة، هتلاقيها بتغير أوي وبتجيلك تفكرك بنفسها.

7- إلهام مبتحبش الأبواب والشبابيك المقفولة. افتحي لها أبواب روحك بالصلاة والحب (لأي حاجة)، هتلاقيها موجودة.
8- خلّي معاكِ دايمًا ورقة وقلم، نوتة، App على الموبيل تقدري تدوني فيها أي حاجة في أي وقت سواء صوت أو صورة أو كتابة.
إلهام أنانية، دي الحقيقة المرة، بس لو قررت تمنحك شوية من صندوقها، يا بختك. والصبر صنعة.

المقالة السابقة5 مراحل عشان تلبسي الدبلة في اليمين
المقالة القادمةحدود طاعة الوالدين، حكم طاعة الوالدين في الزواج
كاتبة وصحفية مصرية

ترك الرد

الرجاء إدخال تعليقك!
الرجاء إدخال اسمك هنا