دعوات الفرح كانت زمان وسيلة أساسية لمعرفة ميعاد ومكان الفرح وإخبار المعازيم، مؤخرًا بعد ظهور مواقع التواصل الاجتماعي، بقي من الأسهل عمل event ع الفيسبوك ودعوة الأصدقاء، وكام مكالمة تليفون والحكاية تخلص. ومع الوقت دعوات الفرح مبقاش لها لزمة، ولكن أصبح لها رونقها الخاص، فأصبحت رفاهية و"افتكاسة" العروسة والعريس بيحبوا يعملوها، وأصبحت كمان مهنة للبعض، وهي عمل دعوات فرح بشكل شيك وجديد وعصري، ولأن الفرح بيبلع مبالغ مهولة فمحدش ناقص مصاريف زيادة هو مش أدها، فدي شوية أمثلة لدعوات الفرح اللي ممكن تصمميها بنفسكDIY ، أو بشوية مساعدة خارجية بسيطة، أما آخر مثال في المقال ده فهو مفاجأة مستنية رأيكم فيها:
الشياكة
ده مثال لدعوة الفرح البسيطة، مش هتحتاجي غير إنك تكتبي الكلام وتطبعيه على فرخ كارتون بتجيبيه من المكتبات الكبيرة زي "ألوان" أو "سمير وعلي"، هتطبعيها في أي مكتب طباعة هندسية وبعدين تقصيهم بنفسك أو تخلي المكتب نفسه يقصهملك بمبلغ مش كبير. هتلزقي الأفرخ على بعضها، وتزينيها بشريط ستان تجيبيه من محلات زي "كل شيء" و"النمرسي". ممكن بدل الشريط الستان تجيبي أي نوع تاني من الشرايط، وممكن كمان تشتري بدالها دانتيل أو شيفون وتفنني في شكل الكارت، بل وكمان ممكن تجيبي التشكيلات الورقية بتاعة الجاتوهات عشان تزيني بيها الكارت.
التقويم
ودي عبارة عن مشبك مرشوش ومكتوب عليه بالألوان، وماسك في ورقة تقويم بسيطة متعلّم عليه يوم الفرح، أو حتى عبارة عن ورقة تقويم من غير مشبك ومتعلم على اليوم والتاريخ، مع صورة صغيرة وكلام بسيط.
الفستان
دعوات فرح بتتمحور حوالين فستان العروسة، اللي هو بيبقى غالبًا أهم حاجة في الفرح، ممكن يكون كارت مطبوع وبيتم طباعة الكتابة على الفستان الأبيض. أو إن الفستان يكون هو الكارت نفسه، ممكن تستعيني بدانتيل أو شيفون وخرز صغير لتزيين فستان العروسة.
اللعبة
اللعبة هي نوع لذيذ جدًا من الدعوات، لكنها غالبًا مش بتنفع غير لأصحابكم اللي من سنّكم اللي هيتفهموها. دول 3 أمثلة سهل اللعب بيهم، الأول هو إنك تطبعي على بازل دعوة الفرح، تفككيها وتديها للمعازيم عشان يركبوها ويعرفوا التفاصيل، تقدري تطبعيها في استوديوهات التصوير، أو ممكن تسألي في العتبة مثلًا على ناس ممكن تطبعلك على البازل عشان يبقى سعره أرخص.
تاني مثال أبسط من البازل بكتير، بيفكرنا باللعب الورقية اللي محدش بقى بيلعبها، هتكتبي التفاصيل وأي حاجة إنتي عايزاها بالطريقة دي، وابعتيها متطبقة للناس بحيث إنهم يعيدوا تطبيقها عشان يعرفوا يلعبوها ويعرفوا التفاصيل بتاعة الفرح.
أما التالت فهو إنك تطبعي على البالونات، ولازم البالونة تتنفخ عشان يعرفوا يقروا اللي مكتوب عليها.
البصمة الخاصة
لمزيد من التخصيص، ممكن بصمة صوابعكم تعمل قلب، ولأن محدش فاضي يعمل كده في كل كارت منفصل، ممكن تعملوها على ورقة وتعملولها مسح إلكتروني (scan) وتطبعوها على الورق. ممكن كمان تخصصوا طابعة متميزة ليكم، ودي سهلة ورخيصة جدًا وبتتعمل في العتبة.
مواكبة العصر
لأننا في عصر التكنولوجيا، فشيء كويس و"مطرقع" إن دعوة الفرح تكون على شكل برواز الويندوز، أو على شكل إنفوجرافي زي اللي بنشوفه بشكل شبه يومي على الصفحات الاجتماعية.
تجربة شخصية
آخر مثال زي ما قلتلكم هو تجربة شخصية، هحكي تفاصيلها خطوة خطوة كتوضيح إن أي فكرة ممكن تتنفذ ولو بمواد وخامات بسيطة جدًا. أنا كنت عايزة الكارت يكون بيتفتح بطريقة محورية مش إنه يكون بيتطبق ويتفتح، على ما أخدت وقتي عشان أعرف هعمل كده إزاي، كنت اتفقت مع الصديقة العزيزة شيماء إنها تعمل شخصياتنا بالكارتون وإحنا راكبين فيل، عملت الكارتون بطريقة حلوة جدًا واستحملت ملاحظاتي وفوجئت إنها بتقولي بعد كده إن الديزاين ده هدية منها لينا. اتعلمت جزء جديد من الفوتوشوب عشان أعمل الحدود الخارجية للشكل، وبعدين نقلت الحدود دي فارغة وكتبت فيها الكلام بتاع الدعوة، لأن الكارت هيكون عبارة عن وجهين، وجه فيه شخصياتنا بالفيل، ووجه فيه الكلام. شيماء ظبطت التظابيط وطبعنا الكروت على أفرخ كبيرة.
الخطوة اللي بعدها إننا نقص الكارت، ولأنه شكل منحني مش مستقيم فمحتاج دقة، وعليه بابا أخد الأفرخ وراح العتبة، وهناك الكروت اتقصت بالليزر على الحدود الخارجية اللي أنا كنت حددتها قبل كده، بالطريقة دي مش فاضل غير إني أمسك الوجهين ببعض، ودي كانت حاجة أنا مش عارفة هعملها إزاي.
أخدت الكروت وطلعت على محل "كل شيء" وشرحت الحكاية للبنت اللي كانت واقفة، تحمست جدًا وقعدت تفكر معايا، اتفقنا إننا هنمسك الكروت بكباسين بلاستيك شفافة، وإننا نخرم الكروت بإبرة طويلة أوي وسميكة مش عارفة بتاعت إيه. لما جيت أخرم الكروت بالإبرة كان شيء مرهق جدًا لإيدي، فتفتق ذهن بابا إننا نخرم الكروت بأداة خرم الأحزمة الجلدية، وفعلاً عملنا كده، وكانت الكروت اللي ظاهرة في الصورة دي.
الأفكار كتيرة واستحالة تتحصر في موضوع واحد، لو عايزين تعملوا فعلاً كروت مميزة لليوم ده بنفسكم، اتفرجوا كتير على أمثلة لدعوات الفرح أو دعوات عيد الميلاد أو أي دعوات، افتحوا مدارككم ووسعوا خيالكم، واعرفوا إن كل ما كانت الدعوة بسيطة ولطيفة وطالعة من القلب، هتكون أحلى وأحلى. شاركونا آرائكم وصوركم لو عملتوا كده فعلاً في الفرح أو ناويين تعلموا كده.
اقرأ أيضاً: 24 نصيحة لتستمعي بحفل زفافك
اقرأ أيضاً: أفضل وأسوأ الأطعمة يوم زفافك
