الأنوثة.. سفينة الباق باق اللي كلنا بنحاول نوصلها ودايمًا بتبقى النتايج مش مرضية، ونرجع نعيد م الأول ونسعى من تاني ومبنعرفش.
طب عشان نعرف نوصل لأنوثة طاغية.. إيه الخطوات اللي ممكن نمشيها وتنجح؟ كده محتاجين نعرف الأول إيه هي علامات الأنوثة. امممم شكل الموضوع معقد شوية.. بس ولو.. هنوصل.
هل مظاهر الأنوثة ف الجسم المنحوت والكعب العالي؟ ولا ف الصوت الواطي والنحنحة؟ ولا يمكن إظهار مفاتن الجسم!
الحقيقة الموضوع نسبي شوية وبيختلف من زمن لزمن ومن مكان لمكان وحتى من شخص لشخص.. دورت ف الموضوع ده لقيت إن مظاهر الأنوثة مثلاً عند القرويين ف البشرة الفاتحة والتُخن إلى حد ما،
والنموذج الأمثل كان نجمات التسعينات.. عند المتمدنين هي الكعب العالي والصوت الناعم والضحكة من غير صوت، وهنا كان التارجت البراندات الأوروبية الكلاسيك.. ف بعض الأوساط الشعبية هي اللبس الملفت الكاشف لمعالم الجسم، وعشان كده انتشر الفسفوري والليجان والفيزون.
أسرار الأنوثة والجاذبية عبر القارات
لو خرجنا من مصر ورحنا مثلاً امممم.. فين؟ فين؟ نبتدي بالصين.
مظاهر الأنوثة ف الصين هي القدم الصغيرة.. لدرجة إن لحد قريب كان الأمهات بيتنوا أقدام بناتهم ف سن أربع أو خمس سنين ويربطوها جامد بقماش
وكل فترة يفكوها ويشدوا الرباط أكتر ويحشروها ف جزمة طولها حوالي 10 سنتيمتر، وكانوا بيسموها القدم الذهبية أو قدم اللوتس
والستات اللي رجلهم كبيرة كانوا مجال للسخرية والنقد لأنهم كده أشبه بعاملات الحقول غير القادرات على تحمل رفاهية القدم الذهبية، وكانوا عشان يخففوا عن البنت الألم يقنعوها إن ده هيخليها أجمل وتتجوز أسرع.
تعرفي على: 13 سببًا لتتمتعي بالثقة الجنسية.. اعرفيها
طب نخرج م الصين وماديتها الحادة ونشوف مكان أكثر رفاهية وطبيعية.. تايلاند، حيث الجزر والخضرة والأفيال.
عندهم مظاهر الأنوثة إن الست تبقى رقبتها طويلة، فالستات يعملوا إيه بقى! لفوا حلقات نحاس حوالين رقابهم عشان تشدها وتخفض مستوى الأكتاف فتبان الرقبة أطول، ومش بتتفك إلا كل كذا سنة عشان تزود طولها..
عارفة رقبتها طويلة دي يعني أد إيه؟ ممكن توصل لـ50 سنتيمتر، آه والله! مهما كان البنت شكلها وطبعها، لكن أم رقبة أطول هي الأكثر جاذبية للعرسان، (نظام عندي ليك عروسة بنت ناس ومتربية ورقبتها أطول من دراعي)!
بعض الأقاويل بتقول إن العادة دي مكتسبة من زمان عشان تحمي الستات من عضات النمر، وبعضهم قال إن عشان يتشبهوا بشكل أسطورة التنين اللي بيحمي قبائلهم، لكن البنات هناك بتقول إن عشان يبقى شكلهم جذاب وأكثر أنوثة.
اقرئي أيضًا: نعومة الرجولة وقوة الأنوثة
طيب إحنا مش عايزين الأماكن الغريبة دي، عايزين ثقافة تشبهنا، نشوف العرب؟
العرب عندهم حاجة اسمها “الدَّقَة” أو الوشم يعني، اللي إحنا بنقول عليه “تاتو” بس التاتو عندهم بيتعمل من غير بنج بإبر ملونة ف الوجه، ورغم إن أديانهم بتحرّمه لكن صعب تلاقي سيدة عجوز مخدتش نصيبها من الدقة.. عشان تبقى أجمل وأكثر جاذبية وأنوثة بتقلب وشها لوحة فنية.
طب بلاش نلف ف البلاد.. خلينا نلف ف الأزمان، مش هنروح بعيد أوي.
تعرفي على: أسرار جمال البنت الفلات
علامات الأنوثة عبر الأزمان
مثلاً ف أوائل القرن العشرين كانت الأنوثة هي مفاتن الجسم الضخمة والخصر الرفيع، بعدها بشوية بقت الأنوثة ف الشعر القصير والتصرفات اللا مبالية زي التدخين مثلاً واللبس القصير، ف السبعينات كانت الأنوثة ف المظهر الرياضي والجسم القوي مفتول العضلات.
اقرأ أيضًا: الجمال بين الألم والأمل
الأنوثة هنا.. دلوقتي
خلاص مش هنلف بلاد ولا هنروح لأزمان تانية.. خلينا هنا ف مصر.. ودلوقتي؟ للأسف الأنوثة هنا معناها مش هيختلف كتير عن العادات الغريبة اللي فاتت، هناك بيحبسوا الستات ف جزم ضيقة وهنا بيحبسوها ف مقاس لارج وضحكة صفرا عشان القهقهة مش شيك.. هناك بيطوقوا رقبتها بحلقات نحاس وهنا بيطوقوا روحها بالشعر الليس والكعب العالي ونموذج النجمة الفلانية.
صفات الأنوثة الحقيقية
لو سيبنا كل العادات ورجعنا لأصل الموضوع، خلينا نشوف أصلاً إيه معنى لفظ “أنوثة” وأصله ف اللغة.
ف المعاجم لقينا إن الأنوثة أنَّثَ الشيء إذا لان ولم يتشدد.
الله! حلو أوي، الأنوثة يعني الليونة والسلاسة في المعاملة.
طبعًا كل شخصية ذكورية هترجم الموضوع على إن الأنوثة هي الضعف، وكل شخصية نسوية متطرفة هتقول ملعون أبو الأنوثة مش عايزاها. بس الموضوع مش كده.. الليونة مش معناها الضعف.. بالعكس، الشيء المرن هو اللي بيصعب كسره، هو اللي بيعرف يتواءم مؤقتًا مع اشتداد الريح، وأول ما العاصفة تعدي يرجع بنفس شموخه، بعد ما تكون كل الأعواد العنيدة اتقطمت.. هو اللي عارف إن التقل صنعة. وإمتى يصلب وإمتى يمرح وإمتى ينام.
الأنوثة معنى نابع من جواكي، مش وصفة بتمشي عليها تغير ملامح شكلك وتخليكي من برة غير جوة. الأنوثة مش إنك تحبسي روحك ف جزمة ضيقة ولا حلقات على رقبتك ولا سايز 38، الأنوثة إنك تخلي شكلك وجسمك عاكس لروحك وشخصيتك. جسمك مليان طاقة لا متناهية.. اطلقي العنان ليها وابتدي البحث عن نفسك وشكلك اللي يشبهك إنتي.. إنتي وبس.
كل أنثى امرأة وليست كل امرأة أنثى.. فكوني الأنثى التي تريدين.
