4 أفكار لسفرية دلع سريعة بالتفاصيل

638

 

أهلاً بيكي في الساقية الكبيرة المجنونة اللي بتلف فيها كل ستات العالم يوميًا بلا توقف، إذا كنتي من الناس اللي بتتمنى يوم واحد هادي وسريع تهرب بيه من دوشة الشوارع والمواصلات وضغوط الشغل ومسؤوليات البيت والأولاد، ومطاردات الارتباطات العائلية والاجتماعية، فدي 4 أفكار مختلفة، متفصَّلة على قد يوم سريع من الفصلان والهدوء والاستجمام.

 

1- قرية تونس- الفيوم:

الفيوم ميزتها الأساسية قربها من القاهرة، وسهولة مواصلاتها من أماكن مختلفة، ممكن تركبي ميكروباص للفيوم من المنيب وده الموقف الرسمي، أو من موقف السبتية في رمسيس، أو من ميدان الجيزة، أو من ميدان الرماية.

عشان توصلي قرية تونس في الفيوم، هتكوني محتاجة تركبي ميكروباص يروح: أبشواي – الفيوم، وتطلبي منه ينزلك في قرية تونس، أو تحدديله الفندق أو القرية اللي إنتي هتروحيها هناك بالظبط. المشوار هياخد ساعة ونص بالظبط، والميكروباص هيكون بحوالي 17 لـ20 جنيه.

معظم الأماكن هناك مصممة بطريقة صديقة للطبيعة، ومعماريًا على طريقة م. حسن فتحي، طبيعة المباني هناك وتصميماتها بتحتفظ بالبرودة جواها، البحيرة مع المساحات الخضراء على مدد البصر هيعملولك حالة استرخاء إجبارية.

 

الأماكن المقترحة في قرية تونس الفيوم:

فيه مجموعة من الفنادق الصغيرة أو المنتجعات السياحية، اللي بتوفرلك قضاء يوم واستخدام منافع المكان بأسعار بسيطة، وبتوفر كمان المبيت بأسعار تبدأ من 180 جنيه للغرفة الثنائية. دي مجموعة اقتراحات لأماكن في الفيوم وطرق التواصل معاها:

 

– قرية زاد المسافر: هنا

 

– فندق سوبك: هنا

 

– فندق بيوم ليك: هنا

 

– منتجع لازيب إن: هنا

 

الأنشطة المقترحة:

– نشاط تعليم الخزف من أشهر الأنشطة المشهور بيها المكان، هتلاقي معارض خزف كتير جدًا في كل مكان في القرية، وكمان هتلاقي أماكن ورش للخزف هتقضي فيها وقت مختلف.

– ركوب الخيل.

– فيه هناك مكاتب كتير بتطلع رحلات سفاري وتزحلق على الرمال.

– كل الفنادق السابقة بتعمل أكل بيتي وفلاحي وفطير مشلتت وأحلى أكلة بط هتدوقيها.

– الاسترخاء والهدوء والاستماع لصوت الطبيعة.. وده في اعتقادي أهم نشاط.

 

 

2- بورسعيد:

يعني الناس اللي بتحب البحر وريحته، ومشتاقة لأكلة سمك، وقعدة حلوة ع الشط، وذكريات السوق الحرة لما كنا بننزل أفواج نشتري منها الحاجات المستوردة بأسعار أرخص.

بورسعيد تقدر تاخدلها ببساطة السوبر جيت من أقرب موقف سوبر جيت لك، هيكون بحوالي 40 جنيه، وهياخد حوالي ساعتين. هناك ممكن تنزل طرح البحر، وهتلاقي مطاعم وفنادق ومحلات تناسب كل الأذواق.

 

لو بتفكري تباتي، فموقع محافظة بورسعيد بيقدم فكرة كويسة جدًا عن القرى السياحية وأسعارها في بورسعيد، وكمان طرق للتواصل: هنا

 

الأنشطة المقترحة:

– تقدري تدخل أي شاطئ من الشواطئ العامة، واللي تذكرته مش بتزيد عن 10 جنيه، وتاخدي كرسي تحت الشمسية مع كتاب، وتفصلي خالص.

– لو كنتي من هواة الألعاب المائية، شاطئ دعية عنده مجموعة أنشطة هتفرفشك، ممكن تتابعي صفحتهم من هنا، وتابعي الأسعار والعروض اللي بيقدموها كل فترة.

– ممكن تاخدي المعدية من بورسعيد لبورفؤاد، تتمشي فيها شوية وترجعي تاني وتستمتعي برحلة بحرية، قصيرة صحيح، بس متتنسيش مع النوارس وريحة البحر.

– لو من هواة النوستالجيا يبقى لازم زيارة للسوق الحرة، ومترجعيش من غير علبتين كومبوت لزوم العادة مش أكتر.

– مش هوصيكي بقى، أكلة سمك من البرج أو كاستن.

 

 

3- العين السخنة:

ميزتها برضو إن مشوارها سهل وقريب، ممكن تاخدي جو باص لبورتو السخنة، وده تقدري تحجزيه أونلاين من هنا، وممكن تاخدي سوبر جيت للسويس، ومنها أي عربية توصلك السخنة، المشوار هياخد من ساعة ونص لساعتين. وعيبها إنك هتحتاجي تنزلي على مكان معين، وتقضي فيه يومك، مش مدينة مفتوحة للمشي والاختيارات زي الفيوم وبورسعيد مثلاً.

 

الأنشطة المقترحة:

– من بورتو السخنة تقدري تقضي يوم في البحر في يخت، تكلفته للفرد بتكون حوالي 120 جنيه، ولو كنتي مع مجموعة تقدروا تاخدوه مع بعض لوحدكم وتقسموه مع بعض، وقتها ممكن تجربوا تصطادوا، وممكن تتابعوا الصفحة دي بتقدم عروض كويسة لليخوت: هنا 

– من التجارب اللطيفة برضو إنك تاخدي تليفريك العين السخنة وتطلعي الجبل، تكلفته حوالي 75 (الطلوع والنزول طبعًا)، فوق هتلاقي مطعم وكافيه، وقعدة وهمية بتطل على البحر من ناحية والجبل حاضنك من الناحية التانية.

 

 

4- الإسكندرية:

لمحبي الزحمة والسهر لوش الفجر، والناس الرايحة والجاية، والفريسكا وريحة البحر اللي مفيش زيها ف مصر كلها، دي بالنسبة لي الرحلة المفضلة والأسرع، لأن مفيش حاجة ممكن تخطر على بالي أو يكون نفسي فيها إلا وممكن ألاقيها في إسكندرية، ممكن تحجزي قطر من موقع سكك حديد مصر هنا، وده هيكون أسرع حاجة وأكتر حاجة توفر معاكي وقت، في ساعتين ونص هتلاقي نفسك في سيدي جابر وتبدأ الرحلة والانطلاق.

 

فيه اقتراحات لا تحصى لقضاء يوم في إسكندرية، لأنها ممكن يتعمل فيها كل حاجة، لكن دي شوية اقتراحات ممكن تفيدكم:

– السيناريو المفضل هيكون إني آخد فطار سريع وأركب مشروع أو ميكروباص وأطلع ع المنتزه وأقعد وسط الجناين وع البحر أطول وقت ممكن، التذكرة بـ30 جنيه، والمنتزه فيها اختيارات متنوعة في الأكل، سواء التيك أواي أو المطاعم اللي قعدتها ع القلب تشرح القلب.

 

– الناس اللي معندهاش مشاكل مع الزحمة وبتحب تعيش وسط الصخب وحركة الناس، تقدر تختار أي شاطئ على طول الكورنيش، فيه شواطئ مجانية زي جليم – شهر العسل – الهانوفيل – المكس – سيدى كرير، ودول تقدري تدخليهم من غير تذاكر، وتأجري كرسي بجنيه وتقعدي مع البحر والرمل، لكن ده ممكن يكون زحمة شويتين. وفيه شواطئ بتزيد تذاكرها شوية زي الشواطئ المميزة اللي بتكون تذاكرها بـ7 جنيه، والشواطئ السياحية اللي تذاكرها بـ15 جنيه، وأيًّا كان اختيارك، فكوباية عصير متلجة وإنتي دافنة رجلك في الرمل هتنسيكي أتخن ضغوط مضايقاكي.

– زيارة قلعة قايتباي من الأفكار الحلوة، بالذات للناس اللي بتحب الأماكن التاريخية وحالتها، القلعة مفتوحة من 9 الصبح لـ5 مساء، ومتنسيش تاخدي هناك أحلى صور مع البحر، كمان المكان هناك مشهور بالصيد، لو تحبي تخوضي المغامرة دي، لكن هتحتاجي في الغالب حد يساعدك.

 

– آخر حاجة ممكن تاخدي يخت، وده بيكون من منطقة الأنفوشي، وهي قريبة من القلعة، وأسعاره بتختلف حسب حجم اليخت وعدد الأفراد، وده ينفع وقت هايل للانسجام مع الطبيعة ومبادلة الأسرار مع البحر لو إنتي من الناس الرومانسية.

– وبرضو برشحلك المقال ده لو بتدوري على أماكن حلوة تتراح في إسكندرية

أيًّا كان اختيارك، متكسليش تنبسطي حتى لو لوحدك، كتابك ف إيدك، ومزيكتك ف موبايلك، وشنطتك على ضهرك، واخلعي من كل المسؤوليات ولو يوم واحد سريع، اتصالحي فيه مع البحر والشمس والهوا، ودلعي نفسك، واسمعي الطبيعة بتقولك إيه.

المقالة السابقةإنتي أولوية
المقالة القادمةالإنسان يعيش مرة واحدة فقط.. تَخَيَل!
كاتبة

ترك الرد

الرجاء إدخال تعليقك!
الرجاء إدخال اسمك هنا